Пепе се кае што му удри глава на Алиоски, но не му се извини

24 ноември 2020 - 08:06

Француската ѕвезда на Арсенал, Николас Пепе, кој му удри глава на македонскиот репрезентативец Езџан Алиоски завчера во пресметката на „топчиите“ со Лидс, се покаја за глупавиот потег и исклучувањето, но не му се извини на левиот бек.

Пепе беше исклучен во 52-та минута откако во стил на Зинедин Зидан му удри глава на Алиоски, по што веднаш беше испратен на трибините, а потоа пречката и дирекот ги спасуваа „топчиите“ од пораз. За глупоста, Пепе, синоќа реши преку социјалните мрежи да им се извини на сите во Арсенал.

„Го оставив мојот тим на цедило во клучниот период и нема изговор за моето однесување. Многу ми е жал и сакам да им се извинам на навивачите, на соиграчите, на тренерот и на сите во клубот“, објави Пепе.