Шкупи ги брани тепачите: Родителите само сакаа да си ги заштитат своите деца!

24 август 2025 - 18:43

Шкупи, по инцидентот во Штип, реагираше со соопштение во кое посочи дека родителите на децата на скопскиот клуб сакале само да ги заштитат своите деца, иако извештајот од Министерството за внатрешни работи (МВР), но и снимките покажуваат дека тие крвнички ги напаѓаат младите фудбалери на Брегалница.

Чаирчани преку соопштение полно со флоскули ги обвинија и медиумите дека не била прикажана целосно ситуацијата, иако официјално е потврдено дека две деца на Брегалница имаат повреди, од кои едното се здобило со тешки повреди по нападот на родителот.

„Ние како клуб сме длабоко загрижени од клеветите и неточните прикажувања што некои медиуми во Македонија ги прават во врска со нашиот клуб и, пред сè, со нашите деца. Најпрво, изразуваме жалење за тоа што се случи на денешниот натпревар во Штип и категорично го осудуваме насилството.

Фудбалот нема и не смее да има место за насилство. Насилството е надвор од фудбалот. Нашиот клуб со години е посветен на спортското и општественото воспитување на децата. Во соработка со тренерите и родителите организираме предавања речиси секој месец за фер-плеј однесување, почитување и коректност – суштински принципи за развојот на нашите деца. Во денешниот инцидент, важно е да се разбере дека интервенцијата на родителите се случи единствено за да ги заштитат своите деца и да спречат ескалација на ситуацијата. Не постоела никаква друга позадина.

Со ФК Брегалница имаме многу добри односи и се надеваме дека овој инцидент никогаш повеќе нема да се повтори. Ќе работиме уште повеќе за да не доаѓа до вакви ситуации, особено во младинските категории, каде што фудбалот треба да остане само игра и радост за децата. Фудбалот нè обединува - не нè дели. Во својство на координатор на фудбалското училиште, сакам да истакнам дека и нашиот стручен кадар треба да биде сослушан и земен предвид во вакви ситуации. Овие деца се нечии синови, деца на родители кои со многу жртви ги носат секојдневно на тренинзи и натпревари. Никој нема право да гази врз нив или да им создава неправедна слика.

Ќе продолжиме посветено да работиме за да им овозможиме на децата здрав спортски и воспитен развој, секогаш во духот на почитување, коректност и љубов кон фудбалот“, соопштија од Шкупи.

МВР претходно објави дека е уапсен 43-годишниот А.А. кој физички нападнал и повредил двајца малолетници, кои биле пренесени во Клиничката болница Штип за укажување на помош.

Фудбалската федерација на Македонија (ФФМ), исто така, по инцидентот остро го осуди скандалот и најави строги санкции за инволвираните во хаосот.