Ракометарите денеска ќе ги дознаат противниците во квалификациите за ЕП 2028!

26 март 2026 - 12:17

Погледите на спортска Македонија вечерва се насочени кон фудбалскиот бараж во Копенхаген, но неколку часа претходно, вниманието за момент ќе се префрли и кон ракометната сцена, со оглед што избраниците на селекторот Кирил Лазаров ќе ги дознаат противниците во квалификациите за Европското првенство 2028.

Ждрепката ќе се одржи во Лисабон ( 18 часот), а Македонија ќе влезе од вториот шешир. Тоа значи дека во квалификациската фаза ќе избегне дуели со селекции како Србија, Италија, Фарските Острови, Полска, Холандија, Австрија и Чешка – кои се потенцијални ривали од истиот ранкинг. Новата квалификациска приказна започнува на 5 ноември 2026 година, додека последното, шесто коло ќе се одигра на 9 мај 2027.

Според пропозициите, пласман на ЕП 2028, кое ќе се одржи во Шпанија, Португалија и Швајцарија, ќе обезбедат првите две селекции од секоја група, како и четирите најдобри третопласирани репрезентации. Во таа дополнителна пресметка нема да се земаат предвид резултатите против последнопласираните во групите.

РАСПОРЕД НА БАРАБАНИТЕ

БАРАБАН 1: Хрватска, Франција, Германија, Унгарија, Исланд, Норвешка, Словенија, Шведска.

БАРАБАН 2: Македонија, Австрија, Чешка, Италија, Фарски Острови, Холандија, Полска, Србија.

БАРАБАН 3: Белгија, БиХ, Грузија, Грција, Литванија, Црна Гора, Романија, Украина.

БАРАБАН 4: Естонија, Финска, Израел, Косово, Летонија, Луксембург, Словачка, Турција.