Хрватска ја совлада Швајцарија, но ќе чека чудо за пласман во полуфинале на ЕП

Швајцарија моќно го почна мечот и водеше со 5-1, но набрзо Хрватска почна да се буди и го сврте резултатот во своја корист, па на полувреме замина со 13-11.

Хрватите ја одржуваа предноста во второто полувреме, иако Швајцарија успеа да намали на 22-24, сепак немаше сила да го загрози посериозно водството на ривалот.

Најефикасни кај Хрватска беа Звонимир Срна и Иван Мартиновиќ со по пет голови, додека Самуел Зендер запиша шест гола за Швајцарија.

По три одиграни меча, Исланд, Шведска, Словенија и Хрватска имаат по четири бодови, а постои голема можност Хрватите да останат без полуфинале бидејќи претходно Исланд ја шокира Шведска и направи хаос во групата. 

Хрватска ќе мора да се надева на киксеви на Исланд или Шведска во следните две рунди, а ќе мораат да ја победат Словенија за да се пласираат на едно од првите две места во групата 2. 

Исланд во наредното коло ќе се соочи против Швајцарија, додека Шведска ќе игра против Унгарија.