Вардар прокоцка плус седум против Војводина – не даде гол во последните 16 минути (ВИДЕО)

29 август 2025 - 22:54

Екипата на Вардар вечерва претрпе релативно неочекуван пораз во второто коло од Регионалната ракометна лига во Скопје, откако прокоцка предност со седум голови и загуби во пресметката со Војводина (27-28) со гол примен на три секунди до крајот.

Натпреварот започна израмнето, со размена на голови на двете страни. Вардар прв ја презеде иницијативата и дојде до предност од 4-2, но српскиот состав брзо возврати со серија од три погодоци и го сврте резултатот. До 22. минута гостите ја контролираа играта, сè до тајм-аутот на Чупиќ, по кој Вардар заигра далеку подобро и на полувреме замина со водство од четири гола (17-13).

Продолжението носеше уште поубедливи моменти за домашниот тим – на половина од второто полувреме резултатот беше 27-20. Сепак, тогаш започна неверојатен пад во играта. Вардар во последните 16 минути не постигна ниту еден гол, што гостите од Нови Сад умешно го искористија и направија целосен пресврт, за на крај да дојдат до целиот плен.

Во последното коло, Вардар ќе се сретне со големиот ривал Еурофарм Пелистер, единствениот тим со максимален учинок. Војводина пак ќе игра против Ловќен, кој важи за најголем аутсајдер на турнирот.