Партизан и Татран можат да „го наместат“ Вардар да игра со Веспрем во СЕХА!

21 март 2023 - 18:05

Татран Прешов и Партизан го одиграа претпоследниот меч во групната фаза од СЕХА-лигата попладнево во Словачка, а домашниот тим славеше со 29-25. Ваквиот резултат само ја направи појасна опцијата Вардар да падне на последното, трето место во оваа група Б, што би значело дека ќе вкрсти со Веспрем во четвртфиналето.

Иако Татран водеше и со седум разлика на четири минути до сирената, на крај сепак му дозволи серија брзи голови на Партизан што ги остава во игра сите опции за реваншот во Белград, в понеделник (18ч.). Тоа и не е баш по волја на Вардар кој пасивно ќе ја следи разврската со шест освоени бода и гол-разлика 105-105, откако ги заврши своите натпревари.

Сега и Татран му се приклучи со шест бода, но со гол-разлика 80-77, а Партизан остана на три бода и негативна гол-разлика 79-82. Најлошото можно сценарио за Вардар е да заврши трет во групата, а тоа може да биде достигнато во многу редок и случај.

Такво нешто ќе се случи само ако Партизан го совлада Татран в понеделник со три разлика, но притоа во натпревар со барем 55 гола. Или попрецизно, ако резултатот е  29-26 за Партизан или 30-27, 31-28 итн. Во таква ситуација, сите три тима би имале „нула“ гол-разлика, но Вардар би останал со најмалку постигнати голови вкупно и по тој критериум би завршил последен.

Како што е тешко веројатна опцијата за трето место, таква е и можноста за Вардар да го освои првото. И за тоа е потребно Партизан да го совлада Татран со три разлика, но во овој случај потребно е мечот да има малку голови, односно да биде изразен најмногу со 25-22. Овој резултат и секој со три разлика, а помалку голови (24-21, 23-20, 22-19) ќе го качат Вардар на првото место и во тој случај би добиле македонско четврт-финале во СЕХА, бидејќи Пелистер како второпласиран од групата А, го чека победникот од Б.

Со секое друго сценарио црвено-црните ќе останат на втората позиција, без разлика дали е тоа  поубедлива победа на Партизан, или, пак помлака победа, со еден-два разлика. Тука влегуваат и резултатите со три гола разлика кои не ги исполнуваат горните услови, односно 26-23, 27-24 и 28-25. Се разбира, ако Татран воопшто да не загуби, тогаш нема ни да дојде до никаква математика, туку еднотавно ќе го зацементира врвот со повеќе бодови од Вардар.

 

ТАБЕЛА ГРУПА Б

1. Татран Прешов            6 (80-77)

2. Вардар                         6 (105-105)

3. Партизан                      3 (79-82)