Заврши зимницата од Вардар: Македонија остана без директно место во ЛШ!

29 ноември 2023 - 13:28

Македонскиот ракомет по долгогодишен директен настап во Лигата на шампионите, со исклучот на минатата сезона поради казната на Вардар, од следната сезона ја губи директната позиција за место во најелитното клупско европско натпреварување па шансата ќе мора да ја бара со аплицирање за т.н. вајл-карта.

Македонија сега е на 13. позиција со што забележи пад од дури пет места на клупската ранг-листа за сезоната 2024/25, па го загуби местото меѓу првите девет нации за кои има гарантирана позиција во европската елита. Сега дури и шампионот ќе мора да се надева на милост од челниците на ЕХФ, кои во иднина ќе имаат поригорозни проверки на кандидатите за место во ЛШ. Освен буџетот и квалитетот на екипата, на потенцијалните кандидат ќе им се проверува интересот кој го предизвикува во јавноста, финансиската сигурност, како и телевизискиот пазар односно колкав е пазарот на кој ќе може да се промовира маркетингот на ова натпреварување.

Ваквиот пад е резултат на крајот на зимницата која ја обезбеди екипата на Вардар со серијата одлични игри во повеќе сезони, со оглед на двете европски титули на овој тим, но и редовните пласмани најмалку во осминафиналето. За сегашната ранг-листа на клубовите е земено остварувањето на тимовите за сезоните 2020/21, 2021/22 и 2022/23.