Барса за девет месеци, пет пати го победи Реал на три различни континенти

11 мај 2025 - 22:19

Сезоната за заборав на Реал завршува со уште еден пораз од Ел Класико кој за малку можеше да биде избегнат, но поради него, јасно е дека Барса ќе го врати пехарот во своите витрини.

Оваа натпреварувачка кампања, Барса и Реал одиграа четири официјални и еден пријателски меч и сите му припаднаа на каталонскиот тим. Интересно е тоа што сите пет се одиграа на различни терени, во различни натпреварувања и на три континенти.

За време на подготовките, Барса славеше со 2-1 во САД, во октомври го победи Реал на „Бернабе“ со 4-0 во лигашкото Ел Класико, во јануари славеше со 5-2 во финалето од Суперкупот во Саудиска Арабија, минатиот месец со 3-2 во Севиља, во финалето од Копа дел Реј и денеска на Монжуик, во второто Ел Класико во шпанското првенство.

Карло Анчелоти, кој летово ќе се прости со Реал, стана првиот тренер во историјата на мадридскиот клуб кој четири пати е поразен од еден ривал на официјални натпревари во текот на една сезона.