„Не гарантирам дека Вардар ќе игра ЛШ в година, не знам дали ќе опстане!“

Прво, Видерер се обиде да објасни зошто ЕХФ се решила на таков чекор, да го суспендира Вардар и откри дека имале притисок од другите клубови, кои функционирањето на Вардар го квалификувале како мамење.

„Мора да разберете, никој од ЕХФ не сакаше да се реши на ваков чекор бидејќи знаеме дека станува збор за двократен европски првак. Се обидовме да најдеме поинакво решение, во бројни ситуации добивме ветувања, но се остана само на тоа, на зборови. Изнаоѓањето на решение се одложуваше повторно и повторно, искрено верувам дека луѓето од Вардар се надеваа дека ќе успеат да ја средат ситуацијата, но кога не успеаја во тоа, повторно се бараше поинакво решение и одлагање. Од друга страна, ние бевме под притисок од останатите клубови, кои се жалеа дека Вардар победува „мамејќи“, нудејќи им на ракометарите огромни плати за да ги донесе, а потоа не им ги исплаќаше. Откако увидовме дека нема начин да бидат подмирени обврските, бевме приморани да ја изречеме мерката исклучување од групната фаза од ЛШ, нешто што искрено не сакавме да се случи“, изјави Видерер.

Сезонава веќе е во тек и Вардар се помири со отсуството, но прашање е кога и дали наскоро ќе добие можност да се натпреварува во Европа. Видерер вели дека не се во прашање само долговите, туку и општата кондиција на клубот. Можеби нема да дојде до целосен колапс, но во прашање е неговиот опстанок, како врвна екипа, вели претседателот.

„Треба да разберете, со Вардар постојат два аспекти на ситуацијата, првиот е долговите кон играчите и тренерите од минатите сезони, а вториот е ризикот за опстанок на клубот. Не зборувам за опасност од целосен колапс или банкрот, туку дека она првото, долговите може да донесат до блокирање на сметка и потоа за значително ослабување на екипата и не можност да се продолжи натпреварувањето во текот на сезоната. Тоа е нешто од што ЕХФ е директно засегнат, бидејќи ние ја нудиме Лигата на Шампионите како врвен продукт во договорите за ТВ-права и воопшто не сакаме да влегуваме во ризик дали некој тим ќе може да ја заврши сезоната со респектабилен состав. Затоа, од сегашна перспектива не можам да ви кажам: Да, Вардар ќе игра во ЛШ, или дека нема да игра. Она што ќе треба е сите долгови да бидат подмирени, но и федерацијата од своја страна да даде одредени гаранции дека нема да дојде до несакани ситуации или потреси во однос на функционирањето на клубот среде сезона,

Вардар се соочува со побарувања на неисплатени плати од времето на Сергеј Самсоненко и поради тоа беше исклучен од ЛШ. Тоа повелече и заслабување на ростерот, односно неколку договорени засилувања го сменија правецот на својата кариера и не дојдоа во Скопје. Клубот се уште е конкурентен за домашната титула, но ако не се смени состојбата со долговите, прашање е колку долго би задржал респектабилна екипа.