И Вардар му честиташе на Дибиров: Ќе останеш нашиот херој!

05 март 2025 - 21:10

Тимур Дибиров вечерва во поразот на Загреб од Кјелце со 26-27 го одигра последниот натпревар во Лигата на шампионите, а Вардар не заборави на една од своите најголеми легенди.

Дибиров дресот на Вардар го носеше девет сезони и стана најдобриот стрелец за „црвено-црните“ во Лигата на шампионите со постигнати 525 голови. Во тој период руското крило со Вардар и двапати се искачи на тронот на Европа.

Во честитката на социјалните мрежи Вардар порача и дека го чека Дибиров во Скопје.

„Дојде во Вардар,  играше, освои се што можеше, и влезе во легендите.  Ти благодариме што девет сезони беше дел од клубот и заедно се радувавме на сите успеси. Те чекаме во Скопје и заедно да прославиме. Ќе останеш секогаш нашиот спортски херој“, објави Вардар.

Вкупно во својата кариера Дибиров одигра 21 сезона во Лигата на шампионите.