Тиквеш се радуваше во Скопје, нерешено во Струга

24 септември 2022 - 19:29

Екипата на Тиквеш се качи на првото место во групата Б, од домашната ракометна Суперлига, откако во четвртото коло ја забележа третата победа сезонава.

Кавадарчани без многу проблеми славеа на гостувањето кај РК Скопје, со 28-20. Триумфот го најавија со сигурниот старт и  раното„бегство“ со 4-0, а потоа и максимални плус осум на патот до 18-11 пред големиот одмор. Скопје немаше начини да се врати во вториот дел и Тиквеш нанижа нови бодови, предводен од првиот стрелец во лигата, минатата сезона, Страхиња Симиќ, со девет погодоци. Кај Скопје, Јакимовски, Бајрактаревиќ и Кузмановски постигнаа по четири гола.

На вториот меч во тој термин попладнево, Струга и Прилеп си поделија по еден бод, играјќи 25-25. Гостите можат да жалат, не само затоа што примија гол во финишот кој им ја украде победата, туку и поради фактот што до 50. минута имаа 21-17. Грузиецот Гвашелишвили со осум гола беше најдобар стрелец и кај гостите и на натрпеварот, а за Струга, Бугариновиќ и Костоски погодија по шест пати.

Ова беше натпревар од групата А, во кој Прилеп го освои првиот бод, а Струга дојде до седум. Во групата Б, пак, Тиквеш е лидер со девет бода, пред Пелистер со седум.