Лазаров: Горд сум што и сезонава ќе го продолжиме – македонскиот концепт!

Првата прозивка се одржа во салата „Автокоманда“, каде што тренерот изрази задоволство од атмосферата и ангажманот на играчите. Тој повторно го нагласи својот став за континуираниот развој на клубот преку јасна и постепена стратегија, без големи ризици и импровизации. Најголем акцент стави на тоа дека Алкалоид и во новата сезона ќе го задржи македонскиот концепт, нешто што според него е особено важно за иднината на клубот и развојот на домашниот ракомет.

„Целата стратегија на Алкалоид и поставеноста на клубот е од година в година да се прави чекор понапред. Не сакаме тие чекори да бидат крупни, туку да одиме постепено и да го развиваме клубот. Јас како тренер сум среќен и горд што и оваа сезона останавме со истиот македонски концепт. Позитивен сум од она што го имаме во моментов и со кое располагаме за сезоната“, изјави Лазаров.

„Фармацевтите“ во новата сезона повторно влегуваат со амбиции да се вмешаат во битката за домашните трофеи, но и за чудо во квалификацискиот двомеч со германски Хановер, кое би значело пласман во групната фаза од Европската лига.