Чориќ е најслабо рангиран тенисер што ќе игра финале во Синсинати (ВИДЕО)

21 август 2022 - 10:13

Борна Чориќ ќе игра во големото финале на мастерс турнирот во Синсинати откако утринава го совлада деветиот носител Камерон Нори со 6-3 и 6-4.

Хрватот се враќа на голема врата по операцијата на рамото и за него ова ќе биде само второ мастерс финале во кариерата. Интересно е тоа што тој како моментално 152.тенисер на АТП-листата е најниско рангираниот финалист во историјата на Синсинати.

Во мечот за титулата Чориќ ќе се соочи со Стефанос Циципас, кој со 7-6, 3-6 и 6-3 го совлада Данил Медведев. 

Во женското финале во Синсинати ќе се соочат Петра Квитова и Каролин Гарсија. Квитова во полуфиналето ја победи домашната фаворитка Медисон Кијс со 6-7, 6-4 и 6-3 и вечерва во 20 часот ќе го одигра своето 40-то финале во кариерата. Гарсија пак ја совлада Арина Сабаленка со 6-2, 4-6 и 6-1.