„Организацијата во Египет е ужасна, а секојдневно станува уште – полоша!“

14 јануари 2021 - 11:24

Со синоќешниот натпревар помеѓу домаќинот Египет и Чиле и официјално беше означен почетокот на Светското првенство (СП) во ракомет, што, сепак, не го намали огромните критики кои доаѓаат на сметка на организаторот.

Во тоа предничат од таборот на Норвешка, која од вторникот е во Африка и чии ракометари и тренери биле шокирани од тоа што го видоа на лице место. Негативните импресии прв ги пренесе нивниот најдобар ракометар, Сандер Сагосен.

„Ова е пародија. Сѐ што ни се случува од доаѓањето во Египет е една огромна - смешка. Нема систем, ниту организација каква што ни ветуваа. Условите се ужасни и стануваат полоши од час во час. Тука луѓето без проблеми се шетаат без маски, а ние дури и јадеме со нив во иста просторија. Од сѐ што ни вети организаторот во делот на превенција не е исполнето апсолутно ништо. Ова никако не може да се нарече 'балон'. Моравме да поставиме наши интерни правила, али ни тоа ништо не ни гарантира бидејќи е како на Дивиот Запад. Ни преостанува само да се надеваме дека ќе имаме среќа и нема да се заразиме“, изјави Сагосен.

Норвешка првиот меч на Мундијалот ќе го одигра вечерва против Франција (20.30 часот), додека во исто време и Македонија игра против Шведска.