Хрватите во паника, Арена Спорт се повлекува: Каде ќе гледаме ЛШ и Премиерлига?

12 ноември 2026 - 20:20

Спортската телевизија „Арена Спорт“ постепено ќе се повлекува од хрватскиот пазар, а љубителите на фудбалот во оваа земја се прашуваат каде ќе ги гледаат натпреварите од Лигата на шампиони (ЛШ) и Премиер лигата.

Сопственик на „Арена Спорт“ е „Телеком Србија“, кој уште во февруари 2025 година најави повлекување од Хрватска и Словенија, како и прекин на купувањето нови спортски права за овие пазари.

Иако претходно се шпекулираше дека каналите би можеле да престанат со емитување уште од 1 јануари 2027 година, таков датум засега не е официјално потврден од страна на сопственикот на телевизијата.

Најголемата неизвесност се однесува на Лигата на шампионите, Лигата на Европа и Конференциската лига. УЕФА веќе ја започна продажбата на телевизиските права за периодот од сезоната 2027/28 до 2030/31, но сè уште не е познато која телевизија или платформа ќе ги обезбеди за хрватскиот пазар.

Што се однесува до англиската Премиер лига, „Арена Спорт“ ги има правата во Хрватска до крајот на сезоната 2027/28, додека договорот за италијанската Серија А важи до крајот на сезоната 2028/29. За шпанската Ла Лига веќе е познато дека преносите ќе бидат на „Спорт Клуб“ до крајот на сезоната 2029/30, со сите 380 натпревари во секоја сезона.