Ендрик: Зборував со Бог на клупата, се свртев и ме повикаа

15 октомври 2026 - 08:46

Младиот бразилски напаѓач Ендрик беше еден од главните херои на големиот пресврт на Реал Мадрид против Рома (4-3) во Лигата на шампионите. Влезе во игра во 68. минута, кога мадриѓаните губеа со 1-3, а со погодокот за 3-3 во 85. минута го врати својот тим во игра и постави основа за целосен пресврт.

Ендрик беше прогласен за играч на натпреварот, а по средбата зборуваше за емоциите, вербата, борбата за место во тимот и ситуацијата околу својот сонародник Винисиус Жуниор.

„Сè уште ме држи возбудата од натпреварот и тешко ми е да го опишам тоа чувство. Седев на клупата и разговарав со Бог. Кога се свртев, ме повикаа да влезам во игра. Продолжив да разговарам со Него. Не очекував дека толку рано ќе добијам шанса. Сакам само да му помагам на тимот и на тренерот. Најважно е Реал да победува. Ако престанам да давам сè од себе за победите, прв ќе си заминам. Да се биде дел од Реал Мадрид е голем предизвик и секој ден ќе се борам за своето место“, изјави Бразилецот.

Напаѓачот потоа ја опиша и ситуацијата во која се наоѓал пред да влезе на теренот, кога Реал се обидувал да се врати во натпреварот.

Тој објасни дека во тие моменти бил покрај Мурињо, со наведната глава, а кога повторно погледнал кон теренот, Мален веќе постигнал уште еден гол. Сепак, нагласи дека Реал Мадрид никогаш не се откажува, без оглед на резултатот и околностите. Според него, токму тој карактер бил пресуден за пресвртот. Ендрик додаде дека тимот продолжува со амбиција да се бори за сите трофеи во Лигата на шампионите, Купот и Ла Лига.

На прашањето дали очекува почесто да биде стартер, Бразилецот истакна дека одлуките на тренерите се носат во интерес на целиот тим, а не на поединечен фудбалер. Тој најави дека ќе продолжи напорно да работи секој ден за да им помогне на соиграчите и дека таквиот пристап ќе го следи во текот на целата кариера. Ендрик се осврна и на суспензијата на својот сонародник Винисиус Жуниор.

„Искрено, во клубот очекувавме казната да биде подолга од првично предвидените два натпревара: Лично сум незадоволен од тоа, но Винисиус е силна личност која знае да се справи со тешките моменти и по враќањето ќе биде уште посилен“, додаде младиот напаѓач.

По две кола во Лигата на шампионите, Реал има максимални шест бода и исклучително поволна позиција бидејќи до крајот на лигашкиот дел му претстои само еден тежок натпревар, против Арсенал во Лондон.