Јакимовски: Се надевам дека во февруари пак ќе бидеме комплетни

Играчот на Тренто одигра извонредно против Азербејџан и Ирска, на двата меча беше најдобар стрелец и има огромна заслуга за максималниот ефект.

„Ова е многу важна победа за нас. Мечот беше физички тежок, знаевме дека играме на гости, дека судиите малку ќе бидат на страна на домаќинот, а исто и публиката. Но најважно е што останавме до крај како тим. Нашата хемија ни помогна и можам да кажам дека се боревме во текот на целите 40 минути. Имавме проблем со дефанзивниот скок, тоа не стави во ситуацијата во која бевме на стартот, но со некои детали, мали ситници, дојдовме до ептен важна победа.

Си ја завршивме работата скоро 99%, но ни следат уште два меча во февруари. Задоволен сум како одигравме, особено што бевме заедно краток период и немавме време да се спремиме во целост. Ги искористивме сите работи максимално и дојдовме до важни бодови. Се надевам дека во февруари пак ќе бидеме комплетни. Ова беше уште еден голем чекор кон остварување на главната цел, тоа е квалификациите за ЕП 2029“, рече Јакимовски.

Во февруари, Македонија го пречекува Луксембург и гостува во Азербејџан и две победи на тие два меча со 99% сигурно ја водат во следната претквалификациска фаза.