Алкалоид ја отвора евро-сезоната со гостување во Германија

Тимот од Автокоманда гостува кај бундеслигашот Хановер во рамките на квалификациите за ЕХФ Европската лига и со тоа ќе се обиде да ги продолжи одличните резултати од минатата натпреварувачка кампања. Алкалоид немаше среќа во ждрепката и го доби апсолутно најтешкиот противник во оваа фаза, но и тој ќе биде одличен тест за квалитетот на екипата која се гради неколку години и која најави борба за трофеите во домашниот ракомет.

Хановер минатата сезона долго време беше во игра за шампионската титула во Бундеслигата, на пет кола пред крајот имаше идентичен број бодови како Фуксе кој стана првак, но до крајот тимот од Берлин оствари максимални пет победи, а Хановер освои само еден бод и заврши на шестата позиција со што му избега и местото во Лигата на шампионите. Во текот на летото од екипата си заминаа седуммина ракометари, а дојдоа шестмина кои со досегашниот играчки кадар ќе се обидат не само да го поминат Алкалоид, туку и да ја освојат титулата во Европскиот куп.

Македонскиот претставник подготовките ги одработи во сенка, не учествуваше на турнирите во земјава, но победи на сите пријателски натпревари што ги одигра летово и освои турнир во Словенија. Од тоа може да се заклучи дека Алкалоид се наоѓа во добра форма пред натпреварот со Хановер.

Дуелот се игра од 17 часот во Хановер, а директен пренос ќе има на Македонската телевизија. Реваншот е на програмта во Скопје на 6 септември со почеток од 19:30 часот, а пред почетокот на тој натпревар, на Алкалоид ќе му биде доделен  победничкиот пехар од ЕХФ Европскиот Куп.