Тешка задача пред Алкалоид - ќе брка десет гола негатива против Хановер (ФОТО)

31 август 2025 - 18:59

Македонскиот суперлигаш Алкалоид доживеа убедливо пораз во првиот меч од квалификациите за пласман во ЕХФ Европската лига откако попладнево загуби на гостувањето кај Хановер со 27-37.

Бундеслигашот беше голем фаворит и пред мечот, а на теренот ја оправда таа улога. Алкалоид се држеше до средината на полувреме, период во кој Хановер ја имаше контролата, но предноста ретко изнесуваше повеќе од еден гол разлика. По 11-11, домаќините направија серија од 3-0, а во 24. минута веќе водеа со 18-13. 

На полувреме беше 18-14 за бундеслигашот и во тие рамки се движеше разликата до средината на второто полувреме. По една серија од 4-1, домашниот тим отиде на 27-20, нешто подоцна на 29-21, а во претпоследната минута ја проби и границата од 10 разлика (36-26), колку што и заврши натпреварот.

Новиот играч на Алкалоид, Тордарсон беше убедливо најефикасен во нашиот тим со 10 гола, Борзаш постигна четири, а Митев и Ѓоргиев по три. Тандемот Штајнхаузер-Ушчинс беше најзаслужен за триумфот на Хановер, првиот постигна 11, а вториот осум гола.

Реваншот од двомечот меѓу Хановер и Алкалоид се игра во Скопје на 6 септември. На тој натпревар нашиот тим ќе го добие пехарот за титулата во ЕХФ Европскиот куп од минатата сезона.