Шкупи се пофали со спонзор директно поврзан со кралското семејство од Дубаи!

Чаирчани со овој потег не само што обезбедува нов генерален спонзор, туку и силен сојузник со моќни врски во економијата, дипломатијата и спортот на Блискиот Исток. Како што беше истакнато во соопштението објавено на клупската веб-страница, новиот партнер, претставен преку д-р Сулејман Ташчи – претседател на „Ројал Бизнис совет“, не доаѓа само со финансиска поддршка, туку со јасна визија за трансформација на клубот во регионален центар за спорт и образование. Тој подвлече дека се работи за повеќедимензионален проект, инспириран од европски и светски модели, со цел да се изгради платформа што ќе го поврзе Скопје со Дубаи, Абу Даби, Доха и Ријад.

„Не станува збор само за спонзорство – туку за стратешки проект со цел развој на млади таленти и спортска дипломатија. Шкупи ќе биде централната точка на овој проект на Балканот, со целосна поддршка од нашата институција и од останати инвеститори од Заливот“, истакна Ташчи.

Според приложеното, со оваа соработка, клубот би добил професионална академија во Скопје, соработка со универзитети и академии од ОАЕ, Катар и Саудиска Арабија, партнерство со елитни клубови од Блискиот Исток и Европа и поддршка за 100-годишнината на клубот во 2027 година. Претседателот на Шкупи, Јасин Коњали, подвлече дека овој договор означува влез на клубот во една нова етапа на професионализам и меѓународна интеграција.

„Ние градиме мост меѓу Скопје и Дубаи, меѓу Балканот и арапскиот свет. Ова е патот што ќе ги поведе нашите млади кон големи сцени“, изјави Коњали.

Шкупи сезонава игра далеку под очекувањата на навивачите со оглед што со 34 бода е на дури осмото место на табелата со одамна загубени шанси во борбата за излез во Европа.