Има и добри вести за Барселона: Левандовски може да игра во Милано

04 мај 2025 - 14:44

Иако се очекуваше неговата рехабилитација да трае барем уште една недела, полскиот репрезентативец Роберт Левандовски е подготвен за игра и лекарскиот тим го известил Ханси Флик дека тој може да биде во комбинација за реваншот против Интер во Лигата на шампионите.

Најдобриот стрелец во Ла Лига се повреди на мечот со Селта пред две недели и не играше во финалето од Копа дел Реј, а најавите беа дека би бил способен за игра за претстојното Ел Класико, на 11 мај. Сепак, последните информации се дека тој ќе патува за Милано и ќе може да одигра 35-40 минути на мечот против Интер.

Веројатно мечот на „Меаца“ ќе го почне Феран Торес кој постигна еден од трите гола против Интер во Барселона, а во зависност од резултатот, ќе биде одлучено кога Левандовски ќе влезе во игра. На 48 натпревари оваа сезона, Полјакот постигна 40 гола и три асистенции.