Кошаркарите ги избегнаа Хрватска и Бугарија – добија претквалификациска група за мерак!

Најважно од сѐ е што ги избегнавме Хрватска и Бугарија од првиот барабан, кои според составите и игрите во последно време дефинитивно би биле фаворити во однос на нас, но и што нема да играме со Украина со која и немаме добра традиција. Со Украинците игравме во иста група во квалификациите за СП 2023 и ги загубивме двата меча. Унгарија е селекцијата што ја добивме од најсилниот барабан, што дефинитивно е најдобра опција.

Од последната по квалитет група, пак, ја добивме Романија, која е ривал со кого одамна не сме играле официјални средби, но кој е без некој позначаен успех на меѓународна сцена. Пласман во квалификациите ќе обезбедат двете најдобри репрезентации од секоја од четирите групи.