Меси со мајсторско голчиште му донесе голема победа на Интер Мајами (ВИДЕО)

26 февруари 2025 - 09:30

Фудбалерите на Интер Мајами обезбедија пласман во осминафиналето на Лигата на шампионите на КОНКАКАФ, откако во реваншот од првата фаза го совладаа Спортинг Канзас Сити (3-1) во меч во кој Лионел Меси повторно беше во центарот на вниманието со фантастичен погодок.

Како и пред шест дена аргентинската ѕвезда се запиша во листата на стрелците против Канзас, а овој пат, неговиот гол донесе водство за тимот од Флорида, додека во првиот натпревар постигна победнички погодок. Луис Суарез асистираше за погодокот на Меси, а публиката во Форт Лодердејл имаше уште една можност да му се поклони на фудбалскиот магионичар, кој и на 37 години игра на врвно ниво. Тадео Аљенде зголеми на 2-0 по додавањето на Жорди Алба, а Суарез, по асистенцијата, успеа и самиот да се запише во листата на стрелците за убедливи 3-0. Единствениот гол за Канзас го постигна Мемо Родригез, кој само го ублажи поразот на својот тим.

Интер Мајами во осминафиналето ќе се соочи со Кавалиер од Јамајка. Првиот натпревар е закажан за 5 март, а реваншот ќе се одигра седум дена подоцна.