Алкараз си ја искомплицира ситуацијата, но стигна до финалето во Ротердам

По голема борба, тој вечерва го победи Хуберт Хуркач од Полска со 2-1 (6-4, 6-7, 6-3) иако имаше добра шанса работите да ги реши во два сета. Во првиот се спаси по брејк негатива и по 1-4 освои пет гема по ред за водство од 1-0 во сетови. На стартот од вториот имаше три брејк топки веќе во првиот гем, но не ги искористи и сетот отиде во тај-брејк. И таму имаше предност од еден сервис на противникот (5-4), но Хуркач освои три поени по ред и израмни.

Тоа како да го изнервира Алкараз кој третиот сет го почна со 3-0 и потоа не дозволи Полјакот да му ја загрози победата.

Во утрешното финале, Алкараз ќе се сретне со Алекс де Минор кој и лани играше во мечот за титулата, но загуби од Јаник Синер. За Шпанецот ова е прво финале на турнирот во Ротердам и можност да дојде до првата АТП титула по турнирот во Пекинг, на почетокот од октомври.