Гостите славеа на првите два денешни меча од кошаркарското првенство

14 декември 2024 - 16:18

Двата натпревара со кои почна десеттото коло од Првата македонска кошаркарска лига завршија со победи на гостинските екипи.

Пелистер во третата четвртина го скрши отпорот на Вардар и го победи во Кале со 90-59 за седма победа во првенството. Тој трет период заврши во корист на битолскиот тим со 30-14, па во пресрет на последните десет минути беше 59-34 за актуелниот вицешампион. Ташовски беше најдобар играч на Пелистер со 19 поени и 10 асистенции, а дабл дабл остварија уште Бојиќ (16 поени, 11 скока и Крстевски (12 поени, 10 скока). Најдобар играч на Вардар беше капитенот Бајрам со 17 поени.

На стотина метри од дуелот меѓу Вардар и Пелистер се играше натпреварот на Шкупи и Кожув на кој славеше гевгелискиот тим со 81-68. Кожув нешто порано, во втората четвртина направи висока предност, на полувреме замина со 44-32, па во второто полувреме успеа да го сочува водството и да дојде до шестиот триумф во сезоната. Пилепиќ постигна 26 поени за Кожув, а Хауард оствари дабл дабл со 13 поени и 15 скока. Кај Шкупи, Златевски броеше до 14 поени.