Фудбалерката Салихи жестоко удри по тие што го палеа македонското знаме (ФОТО)

29 ноември 2024 - 19:08

Синоќешниот гнасен чин на палењето на македонското знаме среде Скопје, за време на прославата на граѓаните од албанска етничка припадност на Денот на независноста на Албанија, предизвика огромен револт и кај спортистите, дури и кај тие што се од истата националност како и тие што се дрзнаа да го сквернават нашиот државен симбол.

Една од нив е фудбалската репрезентативка Афродита Салихи, единствена со повеќе од 100 настапи во жолто-црвениот дрес, која удри по извршителите на овој чин и при тоа им одржа лекција на националистите и од албанска и од македонска страна. Таа повика на соживот и на почитување на државата, нацијата, но и на законите, нормите и моралните вредности, барајќи казни за сите што згрешиле без разлика на нивната етничка припадност.

„Не е патриотски чин да се влече и пали знамето на друга националност, со што се поттикнува меѓуетничка омраза во една мултиетничка држава, во која живеат Македонци, Албанци, Турци, Роми, Босанци, Власи...Можеби не е лесно да се прифати фактот дека сите живееме заедно, живееме во земја во која сме посеале злоба и омраза едни кон други, а немаме емпатија и почит“, пишува меѓу другото Салихи, а целото нејзино обраќање може да го прочитате на приложената фотграфија.

Таа се уште е активна на фудбалскиот терен и покрај тоа што има 35 години, настапувајќи за второлигашот Кочани. Неодамна потсети на своите најдобри денови кога на една средба постигна дури 11 голови.