Аморим ги предупреди „ѓаволите“: Ако не се залагате ќе ве пратам во – Бугарија!

22 ноември 2024 - 08:11

Рубен Аморим го започнува својот мандат на клупата на Манчестер Јунајтед со силна порака до фудбалерите, откако португалскиот стратег, познат по својата челична дисциплина, им најави дека нема да толерира мрзливост или несериозност, ниту на тренинзите, ниту на натпреварите.

На еден од првите тренинзи, Аморим ги шокирал своите нови фудбалери.

„Ако не се залагате, ќе ве пратам на позајмица во Бугарија.“

Изјавата предизвикала шок кај играчите, но подоцна тие разбрале дека не станува збор за празна закана. Аморим во 2019 година како тренер на вториот тим на Брага, го казнил Гаус Макута поради несериозен пристап на тренинзите, испраќајќи го на позајмица во бугарскиот тим Берое. Оваа анегдота брзо стана тема на разговор, а многумина ја гледаат како порака дека Аморим нема да дозволи опуштеност во редовите на Јунајтед.

Инаку, Макута денес игра за турскиот клуб Аланијаспор, но неговата епизода во Берое останува пример за последиците од непочитување на правилата под водство на Аморим.

Со овој пристап, новиот тренер на Јунајтед се обидува да го врати тимот на патеките на успехот, поставувајќи јасни граници и барања уште од самиот почеток.