Првото место веќе се смешка: Лесно ја преслушавме надмената Словачка (ФОТО)
Повеќе од крајниот резултат радува играта на избраниците на селекторот Јорданчо Давитков, кои делуваа далеку помотивирани, поборбени и решени да успеат во однос на срамното издание летово кога не успеавме да ја минеме групата со Естонија и Косово во претквлаификациите за СП 2019. Во Војдан Стојановски и Ричард Хендрикс имавме вистински лидери, но и сите останати дадоа максимум од своите можности, што резултира со добра игра и исклучително значајна победа.
Неизвесно беше само во првата четвртина, кога двете селекции се менуваа во водство, по што жолто-црвените ја презедоа контролата врз играта и врз резултатот. Во последните седум минути од вториот период, нашите кошаркари направија серија 18-3, која им донесе неочекувано убедливо водство на крајот од првото полувреме (44-30). Предводени од В. Стојановски и Хендрикс, кои заедно постигнаа 30 поени во овој дел од мечот, слично влеговме и во третата четвртина во која дојдовме до највисоките на мечот плус 18 (57-39).
И, кога помисливме дека преостанува само формалност во последните десет минути, падна концентрацијата на избраниците на Давитков, кои влегуваа од грешка во грешка. Словаците ова максимално го искористија и со 12 поени во низа на стартот од четвртата четвртина намалија на само четири поени разлика (55-59). Но, на наша среќа, противникот во овој дел од играта и направи еден куп грешки во нападот, што беше доволно жолто-црвените да го намалат притисокот и да ја задржат предноста која им донесе голема победа.
Ангажманот на Хендрикс се покажа како полн погодок, откако Американецот со македонски пасош беше централна фигура на вечерашниот дуел со 21 поен и 13 скока. Веднаш зад него беше В. Стојановски со 20 поени од кои 16 во првото полувреме. Дамјан Стојановски и Стојан Ѓуроски реализираа по осум поени.
Тримфот во Попрад за Македонија значи и огромен исчекор кон првото место на табелата во групата во која е уште и Швајцарија. Директно во следната претквалификациска фаза оди само лидерот поради што вечерашната победа над директниот ривал е како злато вредна. Следниот меч за жолто-црвените и е в недела, кога во „Јане Сандански“ ќе ја пречекаат Швајцарија.