Блескава игра, голема победа: Македонија како гостин ја прегази Полска (ФОТО)

Жолто-црвените одиграа фантастичен натпревар во кој покажаа дека заслужуваат по десет годишна пауза да се вратат во европскиот крем. Решеноста да се победи на средбата во Сосновиец се виде уште кон крајот на првата и почетокот на втората четвртина кога со неверојатна серија 21-2 дојдоа до огромни плус 13 (29-16). Ова беше најава за крајниот епилог, а до крајот на полувремето уште во неколку наврати ја имавме оваа највисока предност.

Втор голем блесок имавме и во третиот период, кога почетниот налет на противникот го спречивме со нова серија, овој пат со 20-4 со која дојдовме до предност од неверојатни 23 поени (69-46), која речиси ни ја гарантираше победата. Полјаците од тој момент вратија со 11 поени во низа, со што намалија на „само“ минус 12 (57-69), но тоа не ги уплаши избраниците на селекторот Александар Јончевски, кои вратија со 10-0 и ставија крај на сите можност за некаков сензационален пресврт.

Ненад Димитријевиќ повторно блескаше и средбата ја заврши со 32 поени, на кои додаде и седум скока и осум асистенции. Веднаш зад него беше Итан Хап со 19 поени и седум скока, а двоцифрен поентерски ефект имаа уште и Стојан Ѓуроски со 14 и Андреј Маслинко со 10 поени. Сето ова беше остварено без помошта на Војдан Стојановски, кој се повреди уште во првата минута и потоа воопшто не влезе во игра.

Македонија сега има скор 1-1, колку што има и фаворизираната Литванија, која вечерва загуби на гостувањето кај Естонија (59-65), која, пак, е лидер на табелата со учинок 2-0. Последна е Полска со 0-2, која ионака не е во игра за еден од билетите за ЕП, бидејќи веќе има обезбедено настап како домаќин на едната од групите. Следните две средба за нашите момци се во ноември, кога ќе играме дома и на гости против Литванците.