Адетокумбо со 31 поен ја расплака Италија, Дончиќ не можеше сам против Полска

28 август 2025 - 22:46

Кошаркарите на Грција триумфираа против Италија со 75-66 на крилјата на разиграниот Јанис Адетокумбо, додека Словенија беше непријатно изненадена од Полска со 95-105 на стартот на Евробаскетот.

Адетокумбо беше одличен на теренот против Италијанците, кои не успеаја да најдат решение како да го запрат, а тоа го искористи Грција да замине на полувреме со водство од 36-32.

Нашиот јужен сосед беше одличен и во второто полувреме, додека Италија се мачеше на паркетот, па на крајот мечот заврши во корист на Грција со 75-66. Адетокумбо беше најефикасен на теренот со 31 поен, седум скокови и две асистенции.

Словенија влезе како фаворит во пресметката со Полска, но на крајот излезе како губитник од натпреварот, иако на теренот го имаше Лука Дончиќ, меѓутоа не можеше сам против расположените ривали.

Дончиќ блесна на паркетот со 34 поени, седум асистенции и четири скокови, но Словенија беше ужасна во одбрана и тоа го искористи Полска за да триумфира со 105-95, додека во нивната победа најефикасен беше Џордан Лојд со 29 поени.

Фото: fiba.basketball