Неверојатен пресврт на Атланта, од -30 до победа против најдобриот во лигата (ВИДЕО)

26 март 2024 - 08:17

Пред два дена Бостон Селтикс ја обезбеди најдобрата стартна позиција пред плејофот кога станува збор за Источната конференција, но синоќа доживеа сензационален пораз на гостувањето во Атланта.

Поразот не е сензационален затоа што Бостон загуби, туку поради начинот на кој беше совладан. Кон средината на втората четвртина, Селтикс водеа со 30 поени разлика (68-38) и изгледаше дека Атланта ќе доживее дебакл пред своите навивачи. Место тоа, Хоукс на крајот славеа со 120-118 со што го направија најголемиот пресврт во историјата на франшизата и петти најголем во постоењето на НБА.

Кулминацијата на возбудувањата се случи во претпоследната минута кога Тејтум загуби една топка, а Богдановиќ погоди брза тројка и го доведе домашниот тим во водство од 115-114. Атланта направи серија од 7-2 и го реши натпреварот во своја корист.

Џејсон Тејтум го заврши натпреварот со 37 поени, а веќе на средина од втората четвртина имаше 20. Можеби исходот ќе беше поинаков ако Бостон имаше поширока клупа, односно ако Џо Мазула ги имаше на располагање и Џру Холидеј и Дерек Вајт кои го пропуштија натпреварот. Кај Атланта, сите членови на стартната постава беа двоцифрени, најефикасен беше Хантер со 24, а Богдановиќ постигна 22 поена.

РЕЗУЛТАТИ
Кливленд - Шарлот 115-92
Атланта - Бостон 120-118
Њујорк - Детроит 124-99
Торонто - Бруклин 88-96
Чикаго - Вашингтон 105-107
Хјустон - Портланд 110-92
Сан Антонио - Феникс 104-102
Денвер - Мемфис 128-103
Јута - Далас 105-115
Сакраменто - Филаделфија 108-96
ЛА Клиперс - Индијана 116-133