Најдобриот на последниот Мундобаскет ќе му помага на Кари да дојде до нова титула!

15 декември 2024 - 08:28

Екипата на Голден Стејт вориорс се обидува да си ги зголеми шансите во борбата за нова НБА титула и тоа со големо засилување – германскиот кошаркар Денис Шрудер.

Станува збор за најдобриот кошаркар (МВП) на Мундобаскетот 2023 година, кој доаѓа од редовите на Бруклин нетс како дел од размена за Деантони Мелтон и три избори од втората рунда на идните драфтови. Шрудер, кој оваа сезона беше стартен плејмејкер на Нетс, имаше одлична статистика - просечно реализираше 18,4 поени, 6,6 асистенции, 1,1 украдена топка, со 45% успешност во шутот од игра и 38% за три поени. Со овие бројки, искусниот германски репрезентативец е големи засилување за Вориорс, кои моментално се петти на Западната конференција.

Германецот не е само искусен НБА играч, туку и лидер на својата репрезентација. Со Германија освои бронза на Евробаскетот во 2022 година и злато на Светското првенство во Манила, каде што беше прогласен за најкорисен играч. Кариерата на Шрудер започна во Брауншвајг, а во 2013 година беше избран како 17-ти пик на драфтот од Атланта Хокс. Оттогаш настапуваше за повеќе екипи, меѓу кои Оклахома, Бостон, Лејкерс, Хјустон, Торонто и Бруклин, но никогаш не се задржа долгорочно.

Со неговото пристигнување во Голден Стејт, се очекува Шредер да биде третиот бек во ротацијата покрај Стеф Кари и Бади Хилд, како и клучен играч за одмор на Кари во напорната сезона.