Божиќна магија на Ривс - трипл дабл и кош за победа на Лејкерс (ВИДЕО)

26 декември 2024 - 08:08

Најинтересниот натпревар од божиќната програма го одиграа ривалите од Калифорнија, Голден Стејт Вориорс и Лос Анџелес Лејкерс.

Славеа гостите со 115-113, а кошот за победа беше постигнат во последните секунди. Херој на Лејкерс беше Остин Ривс кој погоди за триумф на неговиот тим и на тој начин го круниса спектакуларниот настап во кој постигна 26 поени, 10 скока и 10 асистенции. Најефикасен во тимот беше Леброн Џејмс со 31 поен и 10 скока, а прв стрелец на мечот беше Стеф Кари со 38 поени.

Ова беше трет пораз по ред на домашен терен за Голден Стејт кој е во долниот дел од табелата во Западната конференција, но се уште на позиција која води во плејаут. Лејкерс славеа по четврти пат на последните пет меча и се израмнија со својот градски ривал Лос Анџелес Клиперс.

Од останатите дуели од божиќната програма, Феникс го совлада Денвер со 110-100, а изненадување направи Филаделфија која како гостин го победи шампионот Бостон со 118-114.

РЕЗУЛТАТИ
Феник - Денвер 110-100
Голден Стејт - ЛА Лејкерс 113-115
Бостон - Филаделфија 114-118
Далас - Минесота 99-105
Њујорк - Сан Антонио 117-114