Кумот на Жељко Обрадовиќ тргна да тепа судии на меч во Израел (ВИДЕО)

04 јануари 2026 - 08:22

Грчкиот стратег, Димитрис Итудис, за малку не направи голем инцидент во израелското првенство, откако на дербито меѓу неговиот Хапоел Тел Авив и Хапоел Ерусалим целосно ги загуби нервите и се обиде физички да се пресмета со судиите.

Хаосот се случи на почетокот од третата четвртина, кога Итудис бурно реагираше на една судиска одлука и тргна да влезе на теренот. Камерите јасно ја уловија неговата неконтролирана реакција, а само брзата интервенција на играчите и членовите на стручниот штаб спречи поголем инцидент, откако со мака го задржаа покрај клупата. И покрај драмата покрај теренот, тоа не донесе пресврт за неговиот тим. Хапоел Ерусалим на крајот стигна до убедлива победа со 92-77. Кај победниците се истакнаа Кејден Керингтон со 20 поени и четири асистенции и Џеред Харпер со 17 поени и четири асистенции, додека во редовите на поразениот тим по 12 поени постигнаа Елајџа Брајант, Томер Гинат и Крис Џонс.

Нервозата кај Итудис, кој е можеби најпознат како кум на Жељко Обрадовиќ и негов поранешен помошник, продолжи и по натпреварот. На прес-конференцијата жестоко ги критикуваше судиите, потсетувајќи и на, како што рече, „скандалозното“ финале од Винер Купот, а особено се пожали на малиот број досудени слободни фрлања за Елајџа Брајант, кој на овој меч шутираше само едно.