Фенербахче шокиран на домашен терен, Димитријевиќ максимално ефективен

29 ноември 2024 - 21:19

Италијанскиот шампион Олимпија Милано ја оствари петтата победа во последните шест кола откако денеска славеше на гостувањето кај лидерот во Евролигата, Фенербахче со 91-85.

Тимот предводен од Еторе Месина не само што доминираше во текот на целиот меч, туку во последната четвртина водеше и со 17 поени разлика. Во финишот Фенербахче се доближи на само четири поени негатива (85-89), но тоа се случуваше во последните секунди и немаше време за целосен пресврт на турскиот клуб.

Најдобар играч на натпреварот беше Никола Миротиќ кој постигна 29 поени и 9 скока за индекс 38, но се истакна и македонскиот репрезентативец Ненад Димитријевиќ. Тој на теренот помина само 19 минути, но максимално го искористи времето, постигнувајќи 15 поени, 4 асистенции и 2 скока за индекс 17, втор највисок во редовите на италијанскиот тим.