Мареска има нов бисер: Тинејџер е новата напаѓачка ѕвезда на Манчестер Сити!

Тинејџерот со својот одличен настап веднаш го привлече вниманието на англиската јавност, која веќе го гледа како една од новите големи надежи на клубот од „Етихад“. Самба пристигнал во академијата на Сити на деветгодишна возраст, а минатата сезона почна сериозно да се истакнува со своите настапи. Во својата прва сезона за екипата до 18 години, тој забележал дури 24 погодоци и 10 асистенции. Овие одлични игри му донесоа промоција во првиот тим ова лето кај новиот тренер Енцо Мареска. На своето сениорско деби, тој ги одигра сите 90 минути и во целост ја искористи дадената прилика, по што англиските медиуми констатираа дека „новата ѕвезда е родена“.

Англиските медиуми веќе почнаа да прават споредби со случувањата во ривалскиот табор, потенцирајќи го влијанието на овој настап.

„Статиите на порталите, објавите на социјалните мрежи и новинските колумни оваа недела беа полни со вести дека 15-годишниот напаѓач Џеј Џеј Габриел е на чекор од заминување од Манчестер Јунајтед. Меѓутоа, таа приказна во петок ќе биде засенета од импресивното професионално деби на 17-годишниот Самба, кој постигна два гола во победата на Сити од 5-0“, пишуваат медиумите на Островот.

Презимето Самба им е добро познато на постарите љубители на Премиер лигата. Флојд е син на поранешниот дефанзивец на Блекбурн и Квинс Парк Ренџерс, Кристофер Самба, кој за овие два клуба одигра 171 натпревар во елитниот шампионат, како и дополнителни 12 настапи во Чемпионшип за екипата на Астон Вила. Сепак, профилот на таткото и синот е целосно различен.

„Како брз и подвижен напаѓач, Флојд тешко дека може да биде поразличен тип на играч од неговиот татко Кристофер, кој беше висок, силен и бескомпромисен стопер“, се наведува во анализата.