Димитриевиќ промовиран во Валенсија: Ова е посебен момент за мене (ВИДЕО)
Димитриевиќ во Валенсија доаѓа од Хувентуд Бадалона, каде беше член од декември 2016 година и имаше просек од 10.6 поени, 1,5 скока и 3,6 асистенции во Ендеса-лигата, а 12,9 поени, 1,6 скока и 13,4 асистенции во Еврокупот.
„Благодарност до клубот за довербата што ми ја дава со четиригодишниот договор. Ова е многу посебен, прекрасен момент за мене и јас сакам да се оддолжам за сета доверба во мене. Ќе се обидам да напредувам и да ѝ помогнам на Валенсија да напредува уште повеќе, ова е голем клуб, сакам да напредувам во него. Тука сум да помогнам да победуваме, да освојуваме трофеи и навивачите да уживаат“, рече Димитриевиќ.
Почесниот претседател на клубот Пако Рага со многу комплименти го претстави македонското засилување кој ќе игра со бројот 0.
„Иако е млад, Нено веќе има искуство од играње на највисоко ниво, кое го покажа и во Ендеса лигата и во европските купови, покажа дека игра во континуитет и мислам дека беше најдобро време да го земеме, зашто има огромен талент, креативност и ја разбира играта, па секако ќе даде голем придонес во новата сезона и во иднина“, рече Рага.
Димитриевиќ се најде на удар од целата македонска кошаркарска јавност и од раководството на КФМ, како и од селекторот Драган Баиќ откако одби да игра на мундијалските претквалификации, по кои Македонија успеа да избори пласман во регуларниот квалификациски тек.