Тиквеш го шокира МЗТ среде Аеродром – сега за плејоф му треба помош од Шкупи!

Кавадарчани сега имаат скор 10-12, односно ист број победи колку Чаир 2030 и Феникс, со кои се во битка за последните две места во доигрувањето, а кои имаат натпревар помалку и тоа денешниот против Гостивар дома односно утрешниот против Шкупи на гости. Чаирчани дури и со пораз ќе влезат во плејофот, додека Феникс ако сака да игра за титулата ќе мора да го победи градскиот ривал, додека ако загубат последното место ќе му го препуштат на составот од Кавадарци поради полошиот однос во меѓусебните средби.

Тиквеш сосема заслужено дојде до бодовите во пресметката со аеродромци, кои немаа резултатски мотив со оглед на одамна обезбедената прва стартна позиција пред доигрувањето како и настапот без тројца повредени првотимци – Андреј Маслинко, Марин Петков и Марко Миловановиќ. Гостите водеа во најголемиот дел од средбата, а на крајот умешно го одбија последниот напад на шампионот и тоа со двете големи тројки на ветеранот Марјан Младеновиќ.

Шо Андерсон со 20 поени и 11 скока беше најдобар кај кавадарчани, додека Младеновиќ дополни со 15 поени, а Ајзеја Хил имаше по 10 поени и асистенции. Дион Едвин со 19 поени и осум скока беше најефикасен кај МЗТ.

Денеска играат уште ТФТ и Пелистер (17 часот), а Работнички утре ќе го пречека Кожув во двата дуели кои ќе го решат пласманот помеѓу второто и шестото место, каде што во игра е уште и Куманово, кој вчера убедливо го победи Вардар (74-57).