Пиротехниката забранета во салите - клубовите ќе плаќаат казни и до 10.000 евра!

02 април 2025 - 21:36

Неодамнешната стравична несреќа во Кочани, каде што во пожар во дискотека загинаа 59 лица, а повеќе од 200 беа повредени, иницира итна промена во законските акти и целосна забрана за пиротехника во затворен простор, нешто што со години наназад многумина го бараа особено на спортските натпревари во сала.

Со промените во Законот за прекршоци против јавниот ред и мир, кои вчера беа усвоени од парламентарците, употребата на пиротехника во затворено е целосно забранета, а се предвидени ригорозни казни за прекршителите. Физичкото лице кое ќе запали факел или било што друго што спаѓа во пиротехника (вклучувајќи ги и петардите) на лице ќе добие казна од 200 до 250 евра. Драматично поголема казна ќе биде за правното лице, во овој случај спортскиот колектив што се јавува како организатор на настанот, кој се соочува со парична казна помеѓу 5.000 и 10.000 евра. Одговорното лице, пак, или во спортот извршните директори на клубовите ќе мора да платат санкција од 250 до 500 евра.

Ова дефинитивно би требало да донесе ред на спортските арени на затворено, каде што во минатото сме биле сведоци на пиротехнички спектакли кои потоа правеле проблеми на актерите на теренот, но и на сите други присутни во салите. Со ова треба да се спечи потенцијалната можност за нова катастрофа, каква што за среќа досега немало во арените, без разлика што најголем дел од нив (ако не и сите) ниту од далеку не ги исполнуваат безбедносните услови запишани во законите, особено во делот за заштита од пожари.