Српскиот режим удри дури и по Ѓоковиќ – го обвини дека се допингува!? (ФОТО)

До сега режимските портали имаа негативни коментари кон него, обидувајќи се да ја минимизираат неговата поддршка, а сега почнаа да се појавуваат и графити на кои тој се обвинува за допинг. Ова не е првпат Ѓоковиќ да се соочи со критики од власта – претходно беше таргетиран и поради својата поддршка за екологистичките иницијативи против ископувањето на литиум.

„Како некој што длабоко верува во силата на младите луѓе и нивната желба за подобра иднина, сметам дека е важно нивниот глас да се слушне. Србија има огромен потенцијал, а образованата младина е нејзината најголема сила. Она што ни е на сите потребно е разбирање и почит. Со вас сум“, напиша неодамна Ѓоковиќ на социјалните мрежи.

Оваа поддршка дојде откако студентите во Србија започнаа протести барајќи одговорност за трагедијата на железничката станица во Нови Сад, каде што загинаа 15 лица. Студентските блокади продолжуваат на факултетите, а сè повеќе средни училишта низ Србија им се придружуваат. Акцијата „15 минути тишина“ се одржува секојдневно во 11:52 часот на повеќе локации во земјата.

Претходно, студентите јавно го повикаа Ѓоковиќ да ја изрази својата поддршка. На социјалните мрежи се појави транспарент со пораката:

„Новак, студентите направија брејк. Сервирај за победа“, алудирајќи на неговата книга „Сервирај за победа“.