Првпат по две години Дончиќ не погоди тројка, Лејкерс изгубија од Голден Стејт (ВИДЕО)

Утринава, во дербито на Калифорнија, Леброн и компанија загубија од Голден Стејт со 116-123 и не ги искористија киксовите на Денвер, па и натаму се на четвртото место на Западот и би можеле во првата рунда од плејофот да играат токму против денешниот ривал. Дуелот наликуваше на директна пресметка меѓу Стеф Кари и Леброн Џејмс, особено во третата четвртина во која играчот на Голден Стејт постигна 13 поени по ред, а ѕвездата на Лејкерс 12 од првите 14 поени за својот тим. На крајот Кари има 37, а Леброн 33 поени.

Од друга страна, надвор од шутерски ритам беше Лука Дончиќ кој постигна 19 поени, но ги промаши сите шест обиди за тројка и првпат по две години одигра натпревар без реализиран шут за три поени. Неговата серија со најмалку една тројка траеше 114 натпревари.

На шест меча до крајот на основниот дел од сезоната, Лејкерс се четврти со 46/30, а Вориорс имаат само една победа помалку. Тука се и Минесота и Мемфис кои имаат по 45 триумфи, но и натпревар повеќе, па јасно е дека во последната недела ќе се води жестока борба за местата кои водат во плејофот.

Куриозитет од шесте ноќешни натпревари во НБА лигата е тоа што славеа сите гостински екипи.

РЕЗУЛТАТИ
Филаделфија - Милвоки 113-126
Вашингтон - Орландо 97-109
Бруклин - Минесота 90-105
Мајами - 108-110
Торонто - Портланд 103-112
ЛА Лејкерс - Голден Стејт 116-123