Кошаркар на МКК Куманово оствари трипл дабл против Вардар

04 април 2025 - 18:44

Дебитантот во Првата лига, МКК Куманово со победа го заврши основниот дел од сезоната откако вечерва славеше на гостувањето кај Вардар со 74-57.

Дуелот што се одигра во „Јане Сандански“ го одбележа кошаркарот на кумановскиот тим Тадија Тадиќ кој оствари трипл дабл и влезе во друштвото на играчи со таков подвиг во македонското првенство. Србинот го заврши мечот со 12 поени, 10 скока и 10 асистенции и е единствен кој оваа сезона оствари трипл дабл во Првата лига.

Гостите беа големи фаворити на овој меч, имајќи предвид дека Вардар е без победа и сигурен второлигаш, но дури во третата четвртина го скршија отпорот на противникот. На голем одмор се замина со 36-31, кумановци го добија третиот период со 21-12 и во последните десет минути влегоа со +14 кои ги задржаа до крајот.

Кај МКК Куманово се истакнаа уште Луковиќ со 19 и Радукиќ со 18 поени, додека капитенот Бајрам со 18 поени беше прв стрелец на Вардар.