Нов доказ дека Антиќ под итно мора да си оди од КФМ – плејофот може да не се игра!?

Делителите на правдата завчера одржаа состанок од кој излегоа со заеднички став дека повеќе нема да судат ако Куќата на кошарката не им ги исплати долгувањата, кои се огромни. Тие немаат земено ниту денар од почетокот на годината на име на такси на отсудените натпревари во сите возрасни категории и конкуренции, што ако се погледне распоредот е сума од која боли глава. Со актуелните средби од регуларниот дел во Првата лига, долгот на КФМ кон елитните судии е за десет кола, што е повеќе од 1.000 евра за секој од делителите на правдата, особено за оние најдобрите кои беа делегирани во секоја рунда. Тие бараат исплата на сите заостанати долгови најдоцна до 8 април (вторник), во спротивно нема да ја делат правдата на мечевите од плејофот, кои по распоред треба да се играат од следниот викенд.

Ваквото недомаќинско работење на Антиќ и неговите соработници е дури и нејасно ако се знае дека парите за плаќање на официјалните лица оваа година не се чекаат од клубовите во вид на котизација туку се добиваат од спонзорот на Првата лига, кому уште пред почетокот на сезоната му ги продадоа правата и кој се рекламира на секој прволигашки натпревар. Ова е трет огромен кикс за се уште првиот човек на КФМ во првите три месеци од 2025 година, откако прво прекина треадиција долга две децении и не организира Избор на најдобрите кошаркар(к) и екипи, а потоа ги пропушти првите два дена од завршницата во Купот на Македонија во Гевгелија поради приватни обврски во Бања Лука.