Гевгеличани најавуваат спектакл во Купот и големо финале помеѓу – Блокотехна и Кожув!
Заедничката улога на домаќини ќе ја имаат прволигашите од овој град, Блокотехна и Кожув, со помош на општина Гевгелија.
„Благодарност до МКФ за довербата која му ја укажа на нашиот град. Гевгелија дефинитивно е кошаркарски град и е единствената заедно со Скопје со две екипи во Првата лига. Верувам дека ќе ја оправдаме довербата. Како домаќин искрено се надевам и посакувам во големото финале да се сретнат Блокотехна и Кожув. Ветувам дека ќе бидеме одлични домаќини и дека ќе бидеме сведоци на фер и коректни натпревари со максимално спортска атмосфера“, изјави Сашко Поцков, градоначалник на Гевгелија.
Пофални зборови за градот-домаќин на завршницата од Купот имаше и спортскиот директор на МКФ, Владимир Темелковски.
„Феноменалната атмсфера на натпреварот кој Македонија неодамна го одигра со Косово беше една од причините да го избереме овој град за домаќин на куп-спектаклот. Блокотехна и Кожув ќе ги покријат финансиските трошоци што исто така беше аргумент плус во овој правец. Верувам дека сѐ ќе мине во спортска атмосфера и дека ќе биде празник на кошарката“, вели Темелковски.
Четвртфиналните дуели се играат в петок, а во нив ќе се сретнат Блокотехна-АВ Охрид, Гостивар-Фени Индустри, МЗТ Скопје-Кожув и Работнички-Куманово.