УЕФА воведе две нови правила за ЛШ, ЛЕ и КЛ - ќе важат уште од оваа сезона!

05 август 2026 - 10:41

Челниците на Европската фудбалска федерација (УЕФА) официјално усвоија две важни измени во правилата кои веднаш стапуваат во сила и ќе се применуваат во нејзините клупски натпреварувања – Лигата на шампионите, Лигата на Европа и Конференциската лига.

Првата новина се однесува на дисциплинскиот систем, па наместо по три, фудбалерите отсега ќе бидат суспендирани по четири добиени жолти картони. Со оваа промена, играчите ќе можат да одиграат повеќе натпревари пред да мора да паузираат поради акумулирани опомени. Втората измена ќе биде видлива и за гледачите на стадионите. УЕФА ја укинува досегашната практика часовниците на официјалните семафори да запираат на 45. и 90. минута.

Во иднина, семафорите ќе продолжат да го прикажуваат времето и за време на судиското надополнување, решение што веќе неколку сезони успешно се применува во одредени национални првенства, меѓу кои и англиската Премиер лига.