УЕФА пресече: ФФМ мора да имплементира ВАР-систем за дуелот со Косово!

Полуфиналниот натпревар од плејофот во Д-групата од Лигата на нации на репрезентацијата на Македонија против Косово, кој со нетрпение се очекува во нашата земја бидејќи е првиот од два чекори кои мора да ги минеме за да се најдеме на Евро 2020, речиси сигурно ќе мора да се игра на арената „Тодор Проески“ во Скопје.

Причина за ова е денешната одлука на УЕФА дека на плејоф-средбите од сите групи ќе мора да се имплементира ВАР-системот, поради што е невозможно оваа средба, која дефинитивно ќе биде од највисок ризик, ќе може да се игра само на нашиот најголем стадион. Тоа значи дека на пресметката со Косовците следниот март овој софистициран систем за помош на судиите ќе дебитира во нашата земја, со оглед што досега такво нешто не беше во поблиските планови на луѓето задолжени за развој на македонскиот фудбал.

Според неофицијалните пресметки, инсталирањето на ВАР-системот ќе чини најмалку 250.000 евра, кои ќе бидат трошок на домаќинот. Истовремено, УЕФА информира дека овој новитет во фудбалот ќе биде задолжителен и во квалификациите за следното Светско првенство (СП), кое во 2022 година ќе се одржи во Катар. Оваа одлука, сепак, ќе мора да биде потврдена и од Светската фудбалска федерација (ФИФА).