Секулов остана без европска титула: Холандија ги здроби италијанските таленти

19 мај 2019 - 19:24

Македонецот Никола Секулов, кој пред шест месеци избега од Македонија за да игра за Италија остана без европска титула откако денеска „аѕурите“ загубија убедливо од Холандија со 2-4 во финалето на Европското првенство до 17 години во Р. Ирска.

Секулов кој и овој меч го почна како резерва, влезе во игра во 47-та минута од мечот, кога веќе победникот практично беше решен уште во првиот дел, кога „лалињата“ постигнаа три гола преку Хансен во 20-та, Банис во 37-та и Матасен во 45-та.

Секулов, кој е фудбалер на италијански Јувентус играше за Македонија до 17 години во 2017 година и потоа „исчезна“, а лани беше откриено дека одбил да игра за нашата селекција и дека потоа го префрлил фудбалскиот пасош во Италија, а ФИФА пред неколку месеци даде дозвола за да игра официјални мечеви за „аѕурите“ и со тоа земјава го загуби еден од најголемите таленти во моментов.

Италија постигна гол за искра надеж преку Коломбо во 56-та, а Иривар во 70-та ја запечати убедливата победа за да ѝ донесе на Холандија европска круна во младинска категорија. До крајот, Коломбо постигна уште еден гол за Италија колку да го ублажи поразот.