Само детали останаа до промоција: Новата ЛШ со 36 тима и без досегашната групна фаза!

Ањели посочи дека во следните две недели ќе се допрецизираат само ситните детали и комплетната структура на новата ЛШ, по што за три години ќе стартува реформираното елитно натпреварување во кое ќе се зголеми бројот на мечеви на 225, а ќе има необичен начин на функционирање.

Екипите ќе бидат поделени во четири зони, од најсилна до најслаба според рејтинг, тие од првата А-зона ќе играат двапати со тимови од својата зона, по три од Б и Ц зоната, а уште два од најслабата. Ќе се игра по швајцарски модел како во шахот, па резултатите ќе зависат кој противник ќе им биде за следно коло. На овој начин би требало да се зголеми возбудата во ЛШ, а наместо досегашните шест меча во групите, секој тим би играл по 10 во првиот дел од сезоната.

Нема да има групи, туку ќе има генерален пласман, по кој најдобрите осум ќе одат во осминафиналето, а од 9-то до 24-то место, преку плејоф ќе ги дадат другите осум осминафиналисти, по што потоа ќе се продолжи во нормална елиминациска фаза. Така европскиот првак за да стигне до пехарот ќе мора да одигра помеѓу 17 и 19 меча во сезоната.

„Јас се надевам дека за неколку недели сите детали ќе ги завршиме, а меѓу тие детали е пријавната листа, односно како четирите клуба дополнително ќе ги добиеме. Мислам дека за две недели би можеле да го имаме комплетниот систем и формат со реформираната ЛШ. Очекувам сѐ да биде решено во следните недели“, рече Ањели.

УЕФА идниот месец има редовен Конгрес, а за очекување е на Извршниот комитет пред Конгресот да се објават сите детали и да се усвои планот за реформите во ЛШ, кои најверојатно ќе го сменат и досегашното име, па мултимилионското друштво ќе се вика – Суперлига на шампионите!