Холандија и Хрватска продолжуваат по трофејот во Лигата на нации (ВИДЕО)

Холандија и Хрватска се победници во своите групи од дивизија А во Лигата на нации, што значи се пласираа на завршниот турнир, за пехарот во ова натпреварување, во јуни 2023.

На Хрватите им требаше победа вечерва во Виена за да го сочуваат првото место во групата 1, во која играа и Данска и Франција. По 1-1 во првото полувреме, со головите на Модриќ, па потоа на Баумгартнер, Австрија беше непрепознатлива во вториот дел, а „коцкестите“ го искористија тоа да слават со 3-1. Ливаја и Ловрен беа срелци на головите за триумф.

Со тоа Хрватска дојде до 12 бода, еден повеќе од Данска, која го стори своето и само чекаше кикс на Модриќ и дружината. Данците ја совладаа Франција со 2-0, со головите на Долберг и на Олсен уште во првото полувреме. Французите, кои се актуелни шампиони во Лигата на нации, уште пред овие септемвриски кола се знаеше дека немаат шанси да го одбранат тронот. Австрија е последна и ќе отпадне во дивизија-Б следната сезона.

 

 

 

Втор патник на завршниот турнир и најверојатно негов домаќин ќе биде Холандија, која е победник во групата 4. Таа вечерва имаше директен дуел со Белгија и доволно ќе ѝ беше и реми да го сочува врвот, но триумфира со 1-0 со погодокот на Ван Дајк во 73. минута. Еден гол пресуди и на вториот дуел во истата група, Полска славеше на гости кај Велс, со погодокот во копродукција на Левандовски и Свидерски. Велшаните останаа на четвртото место, што значи деградација во Б-дивизија следната сезона.

Вторите два учесника на завршниот турнир, кој патем е предвиден за периодот од 14 до 18 јуни 2023, ќе бидат познати во следните два дена, кога ќе се одиграат средбите во групите 2 и 3.