Новата ЛШ ќе донесе уште една револуција: Нема трансфери меѓу екипите од елитата?!

Ањели откри и какви ќе бидат односите меѓу клубовите, како и на самите првенства. За почеток, ќе се промовира ЛШ, а ќе се бара од домашните првенства да ги скратат сезоните. На удар ќе биде англиската Премиерлига, чија сезона е предолга и ќе мора да направат нов распоред, но најголема промена ќе бидат трансферите меѓу гигантите.

Реформите во мултимилионското друштво Лигата на шампионите, кои најдоцна до 20 април треба да бидат промовирани, со проширувањето на елитата на 36 екипи и укинувањето на досегашните групи, ќе донесе уште една револуција и тоа на трансфер-пазарот – нема да може во тековна сезона клубовите учесници да купуваат фудбалери од екипите кои се дел од ова друштво.

Андреа Ањели, првиот човек на Јувентус и претседател на Европската клупска асоцијација (ЕКА) најави вакво нешто, како еден од начините, да се интервенира на „трансфер-пазарот“, а притоа да не се воведува некаков селари кап, што би значело дека клубовите учесници во елитата најмногу би барале засилувања од домашната лига, па парите на гигантите, практично на еден начин солидарно би оделе кај помалите екипи.

„Вакво нешто може да ја развие индиректната солидарност во домашниот фудбал, зашто не би имало трицифрени милионски трансфери во ЛШ, а со тоа некако и би се обезбедила поголема рамноправност меѓу екипите учесници и поголема изедначеност. Клубовите би можеле да се насочат кон пронаоѓање на врвни играчи во помалите земји. Ова се елементи за кои се разговара и можеби ќе дојдеме до некакво решение“, вели Ањели.

Но, ваквиот план има еден проблем, зашто е во судир со европските закони во ЕУ за слободно движење на работниците, па може многу лесно да биде оспорено како дискриминирачки правилник, зашто на еден фубалер му се забранува слободно да се пресели од Манчестер јунајтед во Реал Мадрид. Сепак, останува да се види дали ЕКА и УЕФА ќе најдат начин да интервенираат на трансфер пазаорт, откако актуелниот финансиски фер-плеј не ги постигнува посакуваните резултати, зашто гигантите избегнуваа сериозни казни, а најчесто страдаа малите клубови.

Ањели вчера на генералното собрание на ЕКА, најави дека планот за реформи на ЛШ е скоро „идеален“ и останува само ситни детали да се разрешат, како и делот како ќе се распределат дополнителните четири места со проширувањето, но најави дека за две недели очекува комплетно профатливо решение по што ќе се знае комплетната структура за новата Супершампионска лига која треба да стартува од летото 2024 година.